ಊಟಕ್ಕೂ ಜಾತಿ ಟ್ಯಾಗ್? – ‘ನನ್ನ ಆಹಾರ ನನ್ನ ಚಾಯ್ಸ್’ ಎಂದು ಕಿಡಿಕಾರಿದ ಡಾಲಿ ಧನಂಜಯ್

ಬೆಂಗಳೂರು: ನಟ ಡಾಲಿ ಧನಂಜಯ್ ಅವರು ಮಾಂಸಾಹಾರ ಸೇವಿಸಿದ್ದ ವಿಚಾರವನ್ನು ವಿವಾದವನ್ನಾಗಿ ಮಾಡಿರುವುದಕ್ಕೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ನನ್ನ ಆಹಾರ ನನ್ನ ಆಯ್ಕೆ. ಆದರೆ ಅದರಲ್ಲಿ ಸಮುದಾಯ, ಜಾತಿ, ಬೇರೆ ಕಲಾವಿದರನ್ನು ಎಳೆದು ತರುವ ಪ್ರಯತ್ನ ಬಹಳ ಬೇಸರ ತಂದಿದೆ ಎಂದು ಹೇಳಿದರು.

ನಾನು ನಾನ್‌ವೆಜ್ ತಿನ್ನುತ್ತೇನೆ, ಸೀ-ಫುಡ್ ನನಗೆ ಇಷ್ಟ. ಇದು ನನ್ನ ವೈಯಕ್ತಿಕ ಬದುಕಿನ ಭಾಗ. ಇದನ್ನು ಚರ್ಚೆಯ ವಿಷಯವಾಗಿಸುವುದು ತಪ್ಪು. ನಾನು ಹಿಂದೆ ಪಾರ್ಟಿ ಮಾಡುತ್ತಿದ್ದೆ, ಸ್ಮೋಕಿಂಗ್ ಮಾಡುತ್ತಿದ್ದೆ, ಈಗ ಎಲ್ಲವನ್ನೂ ನಿಲ್ಲಿಸಿದ್ದೀನಿ. ಆದರೆ ನನ್ನ ಊಟದ ವಿಚಾರ ಮಾತ್ರ ದೊಡ್ಡ ವಿಷಯವಾಗಿಬಿಟ್ಟಿದೆ ಎಂದು ಬೇಸರ ವ್ಯಕ್ತಪಡಿಸಿದರು.

ನಾನು ಬಹಳ ಇನೋಸೆಂಟ್ ಆಗಿ ಗೆಳೆಯನ ಹೋಟೆಲ್‌ಗೆ ಹೋಗಿ ಊಟ ಮಾಡಿ ಬಂದೆ. ನಾನು ಈಗಾಗಲೇ 10–15 ಬಿರಿಯಾನಿ ಶಾಪ್‌ಗಳನ್ನು ಓಪನ್ ಮಾಡಿದ್ದೇನೆ. ಈ ಥರದ ವಿಷಯ ಇಷ್ಟೊಂದು ಡಿಸ್ಕಷನ್ ಆಗುತ್ತೆ ಅಂತ ಗೊತ್ತಿರಲಿಲ್ಲ. ಅದನ್ನು ನೋಡಿ ಶಾಕ್ ಆಯ್ತು ಎಂದು ಧನಂಜಯ್ ಹೇಳಿದರು.

ನಾನು ಎಲ್ಲಿ ಮಾಂಸ ತಿಂದೆ ಎಂದು ಹೇಳೋಕೆ ಹೋಗಲ್ಲ. ಚರ್ಚೆ ಶುರು ಮಾಡಿದವರಿಗೆ ಉತ್ತರ ಕೊಟ್ಟಂತೆ ಆಗುತ್ತೆ. ನಾನು ಯಾವತ್ತೂ ಲಿಂಗ ಹಾಕಿಕೊಂಡು ಊಟ ಮಾಡಲ್ಲ. ನಾನು ಏನೇ ಮಾಡಿದರೂ ಪ್ರಶ್ನೆಗಳು ಬರುತ್ತವೆ. ಆದರೆ ನಾನು ಚಿತ್ರರಂಗಕ್ಕಾಗಿ ಮಾಡುತ್ತಿರುವ ಕೆಲಸದ ಬಗ್ಗೆ ಯಾಕೆ ಚರ್ಚೆ ಆಗುತ್ತಿಲ್ಲ? ಎಂದು ಪ್ರಶ್ನಿಸಿದರು.

‘ಬಡವರ ಮಕ್ಕಳು ಬೆಳೆಯಬೇಕು’ ಅನ್ನೋದನ್ನ ಅವರವರ ಅರ್ಥಕ್ಕೆ ತಿರುಗಿಸಿ ಮಾತನಾಡಲಾಗುತ್ತಿದೆ. ಸಂಬಂಧಗಳನ್ನು ಸೆಲೆಬ್ರೇಟ್ ಮಾಡೋಣ ಅನ್ನೋದನ್ನ ನಾನು ಎಲ್ಲೆಡೆ ಹೇಳಿದ್ದೇನೆ ಅಷ್ಟೇ. ಸಿನಿಮಾ ನಟರು ಅಂದ್ರೆ ಒಂದೇ ವಿಚಾರದ ಬಗ್ಗೆ ಮಾತನಾಡಬೇಕು ಅಂತಿಲ್ಲ. ನಾನು ಊಟ ಮಾಡಿದ ವಿಚಾರವನ್ನೇ ದೊಡ್ಡ ವಿಷಯ ಮಾಡುವುದು ತಪ್ಪಲ್ಲವೇ? ಎಂದು ಧನಂಜಯ್ ಕಿಡಿಕಾರಿದರು.