ಬೆಂಗಳೂರು: ಸಾರ್ವಜನಿಕ ಸೌಲಭ್ಯಗಳಿಗೆ ಮೀಸಲಾದ ಸಿಎ ಸೈಟ್ ಹಂಚಿಕೆ ವಿಚಾರ ರಾಜ್ಯ ರಾಜಕೀಯದಲ್ಲಿ ದೊಡ್ಡ ವಿವಾದಕ್ಕೆ ಕಾರಣವಾಗಿದೆ. ಛಲವಾದಿ ನಾರಾಯಣಸ್ವಾಮಿ ಅವರು ಕಾಂಗ್ರೆಸ್ ಸರ್ಕಾರದ ವಿರುದ್ಧ ದಾಖಲೆಗಳೊಂದಿಗೆ ಗಂಭೀರ ಆರೋಪ ಹೊರಿಸಿದ್ದಾರೆ.
ರಾಜ್ಯದ ಜಿಲ್ಲೆ, ತಾಲೂಕು ಮತ್ತು ಗ್ರಾಮ ಮಟ್ಟದಲ್ಲಿ ಪಕ್ಷದ ಕಚೇರಿಗಳಿಗೆ ಭೂಮಿ ನೀಡಲಾಗುತ್ತಿದೆ. ತುಮಕೂರು, ಚಾಮರಾಜನಗರ, ಉಡುಪಿ, ದಕ್ಷಿಣ ಕನ್ನಡ ಸೇರಿದಂತೆ ಹಲವೆಡೆಗಳಲ್ಲಿ ಸಿಎ ಸೈಟ್ ಹಂಚಿಕೆಯಾಗಿದೆ ಎಂದು ಅವರು ಹೇಳಿದ್ದಾರೆ.
ಚಿಕ್ಕಬಳ್ಳಾಪುರದಲ್ಲಿ ಲಕ್ಷಾಂತರ ಮೌಲ್ಯದ ಸೈಟ್ 22 ಲಕ್ಷಕ್ಕೆ, ಬಾದಾಮಿಯಲ್ಲಿ 1.22 ಲಕ್ಷಕ್ಕೆ ನೀಡಲಾಗಿದೆ. ಎಸ್ಆರ್ ಮೌಲ್ಯದ ಕೇವಲ 5 ಶೇಕಡಾ ಹಣಕ್ಕೆ ಭೂಮಿ ನೀಡಿರುವುದು ಸರ್ಕಾರದ ನೇರ ಭೂಕಬಳಿಕೆ ಎಂದು ಆರೋಪಿಸಿದರು. ಒಟ್ಟು 40 ಕೋಟಿ ಮೌಲ್ಯದ ಭೂಮಿಯನ್ನು 2 ಕೋಟಿ ರೂಪಾಯಿಗೆ ನೀಡಲಾಗಿದೆ ಎಂದು ಅವರು ಹೇಳಿದರು.
ನಗರ ಯೋಜನಾ ನಿಯಮ ಪ್ರಕಾರ ಸಿಎ ಸೈಟ್ಗಳು ಶಾಲೆ, ಆಸ್ಪತ್ರೆ ಮತ್ತು ಸಾರ್ವಜನಿಕ ಸೇವೆಗಳಿಗಷ್ಟೇ ಬಳಕೆಯಾಗಬೇಕು. ಆದರೆ ರಾಜಕೀಯ ಬಳಕೆ ನಿಯಮ ಉಲ್ಲಂಘನೆ. ದೇವನಹಳ್ಳಿಯಲ್ಲಿ 17 ಕೋಟಿ ಮೌಲ್ಯದ ನಿವೇಶನ ಕಾಂಗ್ರೆಸ್ ಭವನ ಟ್ರಸ್ಟ್ಗೆ ನೀಡುವ ಪ್ರಸ್ತಾವವೂ ಪ್ರಶ್ನೆಗೆ ಒಳಪಟ್ಟಿದೆ.
ಗ್ರಾಮ ಪಂಚಾಯತ್ ಭೂಮಿಯನ್ನು ಲೀಸ್ ನೀಡಲು ಅವಕಾಶವಿಲ್ಲ ಎಂದು ಗ್ರಾಮೀಣಾಭಿವೃದ್ಧಿ ಇಲಾಖೆ ತಿರಸ್ಕರಿಸಿರುವುದನ್ನೂ ಅವರು ಉಲ್ಲೇಖಿಸಿದರು. ಉಡುಪಿಯ ಅಂಜಾರು, ಕಾರ್ಕಳದ ಕುಕ್ಕುಂದೂರು ಮತ್ತು ಕುಂದಾಪುರದಲ್ಲಿ ಸರ್ಕಾರವೇ ಭೂಮಿ ನೀಡಿರುವುದನ್ನು ವಿಧಾನ ಪರಿಷತ್ ಮಾಹಿತಿ ಬಹಿರಂಗಪಡಿಸಿದೆ ಎಂದರು.
ಈ ಎಲ್ಲವನ್ನು ಉಲ್ಲೇಖಿಸಿದ ಅವರು ತಕ್ಷಣ ಭೂಮಿ ವಾಪಸ್ ಪಡೆಯಬೇಕು; ಇಲ್ಲವಾದರೆ ರಾಜ್ಯಾದ್ಯಂತ ಹೋರಾಟ ನಡೆಸಲಾಗುತ್ತದೆ ಎಂದು ಎಚ್ಚರಿಸಿದರು.
