ಬಹ್ರೇನ್‌ನಲ್ಲಿ ಹಾಸನಿಗರ ಸಂಕಷ್ಟ, ಶಾರ್ಜಾದಲ್ಲಿ ದಾವಣಗೆರೆ–ಚಿತ್ರದುರ್ಗದ ಪ್ರವಾಸಿಗರು ಸಿಲುಕಾಟ

ಹಾಸನ: ಪಶ್ಚಿಮ ಏಷ್ಯಾದಲ್ಲಿ ಉಂಟಾಗಿರುವ ಸೈನಿಕ ಉದ್ವಿಗ್ನತೆ ಕನ್ನಡಿಗರ ಸುರಕ್ಷತೆಯ ಪ್ರಶ್ನೆಯನ್ನು ಗಂಭೀರಗೊಳಿಸಿದೆ. ಬಹ್ರೇನ್ ದೇಶದ ಮನಾಮ ನಗರದಲ್ಲಿ ತಂಗಿರುವ ಹಾಸನ ಜಿಲ್ಲೆಯ ಐವರು ತಮ್ಮ ನಿವಾಸದ ಸಮೀಪ ಬಾಂಬ್ ಸ್ಫೋಟಗಳು ಸಂಭವಿಸುತ್ತಿವೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ. ನಿರಂತರ ಸ್ಫೋಟಗಳಿಂದ ಪರಿಸ್ಥಿತಿ ಭಯಾನಕವಾಗಿದ್ದು, ಹೊರಗಿನ ಸಂಪರ್ಕ ಸೀಮಿತವಾಗಿದೆ.

ಪಂಜು, ಜಮುನ, ಸುರೇಂದ್ರ ಪ್ರಸಾದ್, ರತೀಶ್ ಹಾಗೂ ಮೈಸೂರು ಮೂಲದ ನೇತ್ರಾವತಿ ರಕ್ಷಣೆಗೆ ಕಾಯುತ್ತಿದ್ದಾರೆ. ಕುಟುಂಬಸ್ಥರು ತಕ್ಷಣದ ರಕ್ಷಣಾ ಕ್ರಮ ಕೈಗೊಳ್ಳುವಂತೆ ಕೇಂದ್ರ ಸರ್ಕಾರವನ್ನು ಒತ್ತಾಯಿಸಿದ್ದಾರೆ.

ಅದೇ ವೇಳೆ, ಶಾರ್ಜಾ ನಗರದ ಶಾರ್ಜಾ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ದಾವಣಗೆರೆ, ಚಿತ್ರದುರ್ಗ ಮತ್ತು ಬಳ್ಳಾರಿ ಜಿಲ್ಲೆಗಳ ಒಟ್ಟು 65 ಮಂದಿ ಪ್ರವಾಸಿಗರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಪ್ರವಾಸದ ಭಾಗವಾಗಿ ದುಬೈಗೆ ತೆರಳಿದ್ದ ಈ ತಂಡ, ಪ್ರಸ್ತುತ ಉದ್ವಿಗ್ನ ಪರಿಸ್ಥಿತಿಯಿಂದಾಗಿ ವಿಮಾನ ಸಂಚಾರ ಸ್ಥಗಿತಗೊಂಡ ಹಿನ್ನೆಲೆ ತಾಯ್ನಾಡಿಗೆ ಮರಳಲು ಸಾಧ್ಯವಾಗುತ್ತಿಲ್ಲ.

ಭದ್ರತಾ ಸಿಬ್ಬಂದಿ ಪ್ರವಾಸಿಗರನ್ನು ಸಮೀಪದ ಹೋಟೆಲ್‌ಗೆ ಕಳುಹಿಸಿದರೂ, ಹೆಚ್ಚಿದ ವಸತಿ ವೆಚ್ಚದಿಂದ ಕಷ್ಟ ಅನುಭವಿಸುತ್ತಿದ್ದಾರೆ. ಸುರಕ್ಷಿತ ವಾಪಸ್ಸಿಗಾಗಿ ವಿದೇಶಾಂಗ ಸಚಿವಾಲಯದ ತುರ್ತು ಹಸ್ತಕ್ಷೇಪ ಅಗತ್ಯವಿದೆ ಎಂಬುದು ಕುಟುಂಬಗಳ ಆಗ್ರಹವಾಗಿದೆ.