ಮನೆ, ಆಫೀಸ್ ಅಥವಾ ಕಾರಿನಲ್ಲಿ ಸ್ವಲ್ಪ ವಾಸನೆ ಬಂದರೂ ಸಾಕು, ರೂಮ್ ಫ್ರೆಶ್ನರ್ ಸ್ಪ್ರೇ ಮಾಡುವವರ ಸಂಖ್ಯೆ ಕಡಿಮೆಯೇನಿಲ್ಲ. ಕ್ಷಣಮಾತ್ರಕ್ಕೆ ಆಹ್ಲಾದಕರ ಪರಿಮಳ ಸಿಗುತ್ತದೆಯಾದರೂ, ಇದರಲ್ಲಿರುವ ರಾಸಾಯನಿಕಗಳು ಗಂಭೀರ ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ.
ರೂಮ್ ಫ್ರೆಶ್ನರ್ನಲ್ಲಿ ಏನಿರುತ್ತೆ?
ಗಾಳಿಯನ್ನು ತಾಜಾಗೊಳಿಸುವ ಸುಗಂಧ ರಾಸಾಯನಿಕಗಳು ಇದರಲ್ಲಿ ಇರುತ್ತವೆ. ಸ್ಪ್ರೇ ಮಾಡಿದಾಗ ಈ ಕಣಗಳು ಗಾಳಿಯಲ್ಲಿ ಕೆಲ ಕಾಲ ಉಳಿದು, ಉಸಿರಾಟದ ಮೂಲಕ ದೇಹ ಪ್ರವೇಶಿಸುತ್ತವೆ. ಇದರ ಪರಿಣಾಮ ವ್ಯಕ್ತಿಯಿಂದ ವ್ಯಕ್ತಿಗೆ ಭಿನ್ನವಾಗಿರುತ್ತದೆ.
ಆಗಬಹುದಾದ ಅಡ್ಡ ಪರಿಣಾಮಗಳು
- ಕಣ್ಣು, ಮೂಗು, ಗಂಟಲಿಗೆ ಕಿರಿಕಿರಿ
- ತಲೆನೋವು, ತಲೆತಿರುಗುವಿಕೆ
- ಮಕ್ಕಳು-ವೃದ್ಧರಿಗೆ ಉಸಿರಾಟದ ತೊಂದರೆ
- ಅಸ್ವಸ್ಥತೆ
ಅತಿಯಾದ ಬಳಕೆ ಎಷ್ಟು ಅಪಾಯಕಾರಿ?
ಅಸ್ತಮಾ, ಅಲರ್ಜಿ ಇರುವವರಲ್ಲಿ ಬಲವಾದ ಸ್ಪ್ರೇ ವಾಸನೆ ಕೆಮ್ಮು, ಎದೆ ಬಿಗಿತ, ಉಸಿರಾಟದ ತೊಂದರೆ ಹೆಚ್ಚಿಸಬಹುದು. ಮುಚ್ಚಿದ, ಚಿಕ್ಕ ಕೋಣೆಗಳಲ್ಲಿ ರಾಸಾಯನಿಕ ಕಣಗಳು ಹೆಚ್ಚು ಹೊತ್ತು ಗಾಳಿಯಲ್ಲಿ ಉಳಿಯುವ ಸಾಧ್ಯತೆ ಇರುತ್ತದೆ. ಹಾಗಾಗಿ ಸ್ಪ್ರೇ ಮಾಡಿದ ಬಳಿಕ ಕಿಟಕಿ-ಬಾಗಿಲು ತೆರೆದಿಡುವುದು ಉತ್ತಮ.
ಪಾಲಿಸಬೇಕಾದ ಮುನ್ನೆಚ್ಚರಿಕೆಗಳು
- ಅತಿಯಾದ ಬಳಕೆ ಬೇಡ
- ಮುಖ, ಕಣ್ಣು, ಚರ್ಮದ ಮೇಲೆ ನೇರ ಸಿಂಪಡಣೆ ಮಾಡಬಾರದು
- ಅಡುಗೆ ಮನೆ ಮತ್ತು ಮಕ್ಕಳ ಸುತ್ತಮುತ್ತ ಬಳಸುವಾಗ ಎಚ್ಚರ ಅಗತ್ಯ
- ಬಳಕೆಯ ಬಳಿಕ ಕೆಮ್ಮು, ಕಣ್ಣಿನ ಕಿರಿಕಿರಿ, ತಲೆನೋವು ಅಥವಾ ಉಸಿರಾಟದ ತೊಂದರೆ ಕಂಡರೆ ತಕ್ಷಣ ಬಳಕೆ ನಿಲ್ಲಿಸಿ
ಪದೇ ಪದೇ ಉಸಿರಾಟದ ತೊಂದರೆ ಕಾಣಿಸಿಕೊಂಡರೆ ವೈದ್ಯರನ್ನು ಸಂಪರ್ಕಿಸುವುದು ಒಳಿತು. ಕಿಟಕಿ ತೆರೆಯುವುದು, ಮನೆ ಸ್ವಚ್ಛವಾಗಿಟ್ಟುಕೊಳ್ಳುವುದೇ ವಾಸನೆ ನಿವಾರಣೆಗೆ ಸುರಕ್ಷಿತ ಮಾರ್ಗ.
Join WhatsApp
