ಬೆಂಗಳೂರು: ದಿನನಿತ್ಯದ ಜೀವನ ನಿರ್ವಹಣೆಯೇ ಜನಸಾಮಾನ್ಯರಿಗೆ ಸವಾಲಾಗಿರುವಾಗ, ಇದೀಗ ಬಸ್ ಪ್ರಯಾಣವೂ ದುಬಾರಿಯಾಗುವ ಸಾಧ್ಯತೆ ಎದುರಾಗಿದೆ.
ರಾಜ್ಯದ ನಾಲ್ಕೂ ಸಾರಿಗೆ ನಿಗಮಗಳ ಟಿಕೆಟ್ ದರ ಹೆಚ್ಚಳಕ್ಕೆ ಸರ್ಕಾರ ಸಿದ್ಧತೆ ನಡೆಸಿದ್ದು, ಹೊಸ ದರ ಜಾರಿಯಾದರೆ ಪ್ರತಿದಿನ ಬಸ್‌ನಲ್ಲಿ ಸಂಚರಿಸುವ ಸಾವಿರಾರು ಪ್ರಯಾಣಿಕರ ಜೇಬಿಗೆ ಕತ್ತರಿ ಬೀಳಲಿದೆ.
ಹೌದು, KSRTC, BMTC, NWKRTC ಹಾಗೂ KKRTC ಬಸ್ ಟಿಕೆಟ್ ದರ ಹೆಚ್ಚಳಕ್ಕೆ ಸಂಬಂಧಿಸಿದಂತೆ ಸರ್ಕಾರ ಮಹತ್ವದ ನಿರ್ಧಾರ ಕೈಗೊಳ್ಳುವ ಸಾಧ್ಯತೆಯಿದೆ. KSRTC, NWKRTC ಮತ್ತು KKRTC ಬಸ್‌ಗಳ ಪ್ರಯಾಣ ದರವನ್ನು ಶೇ.20ರಿಂದ 25ರಷ್ಟು ಹೆಚ್ಚಿಸುವ ಪ್ರಸ್ತಾವನೆಯಿದ್ದರೆ, ಬೆಂಗಳೂರಿನ BMTC ಬಸ್ ಟಿಕೆಟ್ ದರವನ್ನು ಶೇ.35ರಿಂದ 40ರವರೆಗೆ ಹೆಚ್ಚಿಸುವ ಸಾಧ್ಯತೆ ಇದೆ.
ಬೆಂಗಳೂರಿನಲ್ಲಿ ಬಸ್ ಪ್ರಯಾಣ ಮತ್ತಷ್ಟು ದುಬಾರಿ?
ಈಗಾಗಲೇ ಪ್ರತಿದಿನ ಕೆಲಸ, ಶಿಕ್ಷಣ ಸೇರಿದಂತೆ ವಿವಿಧ ಕಾರಣಗಳಿಗೆ BMTC ಬಸ್‌ಗಳನ್ನು ಅವಲಂಬಿಸಿರುವ ಪ್ರಯಾಣಿಕರಿಗೆ ದರ ಏರಿಕೆ ಬಿಸಿ ತಟ್ಟಲಿದೆ. ಪ್ರಸ್ತಾವಿತ ದರದ ಪ್ರಕಾರ 0ರಿಂದ 2 ಕಿಲೋಮೀಟರ್ ಪ್ರಯಾಣದ ಟಿಕೆಟ್ ದರ ₹6ರಿಂದ ₹7 ಅಥವಾ ₹8ಕ್ಕೆ ಏರಿಕೆಯಾಗಬಹುದು. 4ರಿಂದ 6 ಕಿಲೋಮೀಟರ್ ಪ್ರಯಾಣಕ್ಕೆ ಈಗಿರುವ ₹18 ಬದಲಿಗೆ ₹21 ಅಥವಾ ₹22 ಪಾವತಿಸಬೇಕಾಗಬಹುದು.
ಇನ್ನು 16ರಿಂದ 18 ಕಿಲೋಮೀಟರ್ ಪ್ರಯಾಣದ ದರ ₹28ರಿಂದ ₹33 ಅಥವಾ ₹35ಕ್ಕೆ ಹೆಚ್ಚಳವಾಗುವ ಸಾಧ್ಯತೆಯಿದೆ.
ದೂರದ ಪ್ರಯಾಣಿಕರಿಗೂ ದರ ಏರಿಕೆಯ ಬಿಸಿ:
ಕೇವಲ ನಗರ ಸಾರಿಗೆ ಮಾತ್ರವಲ್ಲದೆ, ದೂರದ ಪ್ರಯಾಣದ ಬಸ್ ಟಿಕೆಟ್ ದರವೂ ಹೆಚ್ಚಾಗುವ ಸಾಧ್ಯತೆಯಿದೆ.
-
ಬೆಂಗಳೂರು-ರಾಮನಗರ: ₹75ರಿಂದ ₹90ಕ್ಕೆ
-
ಬೆಂಗಳೂರು-ಮೈಸೂರು: ₹165ರಿಂದ ₹200ಕ್ಕೆ
-
ಬೆಂಗಳೂರು-ಶಿವಮೊಗ್ಗ: ₹380ರಿಂದ ₹455ಕ್ಕೆ
-
ಬೆಂಗಳೂರು-ಬೀದರ್: ₹890ರಿಂದ ₹1,150ಕ್ಕೆ
ಇವು ಸದ್ಯದ ಪ್ರಸ್ತಾವಿತ ಏರಿಕೆಯ ಅಂದಾಜು ದರಗಳಾಗಿದ್ದು, ಅಂತಿಮ ದರಗಳು ಅಧಿಕೃತ ಘೋಷಣೆಯ ಬಳಿಕವಷ್ಟೇ ಸ್ಪಷ್ಟವಾಗಲಿವೆ.
ಇಂದು ಮಧ್ಯರಾತ್ರಿಯಿಂದಲೇ ಹೊಸ ದರ ಜಾರಿಯಾಗುತ್ತಾ?
ಸಾರಿಗೆ ನಿಗಮಗಳು ನಿರ್ವಹಣಾ ವೆಚ್ಚ ಹಾಗೂ ಇಂಧನ ಬೆಲೆ ಏರಿಕೆಯನ್ನು ಮುಂದಿಟ್ಟುಕೊಂಡು ಶೇ.40ರಷ್ಟು ದರ ಹೆಚ್ಚಳಕ್ಕೆ ಮನವಿ ಸಲ್ಲಿಸಿದ್ದವು. ಈ ಕುರಿತು ಸರ್ಕಾರ ದರ ಪರಿಷ್ಕರಣೆ ಸಮಿತಿ ರಚಿಸಿ ವರದಿ ಪಡೆದುಕೊಂಡಿದೆ. ಇದೀಗ ವರದಿ ಆಧರಿಸಿ ಅಂತಿಮ ನಿರ್ಧಾರ ಕೈಗೊಳ್ಳುವ ಹಂತದಲ್ಲಿದೆ.
2025ರ ಜನವರಿ 5ರಂದು ಕೊನೆಯದಾಗಿ ಶೇ.15ರಷ್ಟು ಪ್ರಯಾಣ ದರ ಹೆಚ್ಚಳ ಮಾಡಲಾಗಿತ್ತು. ಇದೀಗ ಮತ್ತೆ ದರ ಏರಿಕೆಯ ಚರ್ಚೆ ಮುನ್ನೆಲೆಗೆ ಬಂದಿದೆ. ಇಂದು ಬೆಳಗ್ಗೆ 11.30ಕ್ಕೆ ಸಾರಿಗೆ ಸಚಿವ ಭೈರತಿ ಸುರೇಶ್ ಸುದ್ದಿಗೋಷ್ಠಿ ನಡೆಸಲಿದ್ದು, ದರ ಏರಿಕೆ ಕುರಿತ ಗೊಂದಲಗಳಿಗೆ ತೆರೆ ಎಳೆಯುವ ಸಾಧ್ಯತೆಯಿದೆ. ಹೊಸ ದರ ಇಂದೇ ಮಧ್ಯರಾತ್ರಿಯಿಂದ ಜಾರಿಗೆ ಬರಲಿದೆಯೇ ಎಂಬುದರ ಬಗ್ಗೆಯೂ ಅಧಿಕೃತ ಸ್ಪಷ್ಟನೆ ದೊರೆಯಬೇಕಿದೆ.
