ಮೊಬೈಲ್ ಫೋನ್ ಇಂದು ನಮ್ಮ ಜೀವನದ ಅವಿಭಾಜ್ಯ ಅಂಗವಾಗಿದೆ.
ಕರೆ, ಸಂದೇಶ, ಇಂಟರ್ನೆಟ್ ಸೇರಿದಂತೆ ಹಲವು ಕೆಲಸಗಳಿಗೆ ಮೊಬೈಲ್ ಬಳಸುತ್ತೇವೆ. ಕೆಲವರು ಸುಲಭವಾಗಿ ತೆಗೆದುಕೊಳ್ಳಲು ಶರ್ಟ್‌ನ ಎಡ ಜೇಬಿನಲ್ಲಿ ಮೊಬೈಲ್ ಇಟ್ಟುಕೊಳ್ಳುತ್ತಾರೆ. ಆದರೆ ಹೃದಯದ ಸಮೀಪದಲ್ಲೇ ಮೊಬೈಲ್ ಇರುವುದರಿಂದ ಹೃದಯದ ಬಡಿತದ ಮೇಲೆ ಪರಿಣಾಮ ಬೀರುತ್ತದೆಯೇ ಎಂಬ ಪ್ರಶ್ನೆ ಹಲವರಲ್ಲಿದೆ. ಈ ಕುರಿತು ತಜ್ಞರು ನೀಡಿರುವ ಮಾಹಿತಿ ಇಲ್ಲಿದೆ.
ಮೊಬೈಲ್‌ನಿಂದ ಹೊರಬರುವ ವಿಕಿರಣ ಅಪಾಯಕಾರಿಯೇ?
ಮೊಬೈಲ್ ಫೋನ್‌ಗಳು ನೆಟ್‌ವರ್ಕ್ ಮತ್ತು ವೈರ್‌ಲೆಸ್ ಸಂಪರ್ಕಕ್ಕಾಗಿ ರೇಡಿಯೊ ಫ್ರೀಕ್ವೆನ್ಸಿ ತರಂಗಗಳನ್ನು ಬಳಸುತ್ತವೆ. ಇವು ಅಯಾನೀಕರಿಸದ ವಿಕಿರಣದ ವರ್ಗಕ್ಕೆ ಸೇರುತ್ತವೆ. ಎಕ್ಸ್‌ರೇಗಳಂತಹ ಅಯಾನೀಕರಿಸುವ ವಿಕಿರಣಗಳಿಗೆ ಹೋಲಿಸಿದರೆ ಇವುಗಳ ಶಕ್ತಿ ಕಡಿಮೆ. ಸಾಮಾನ್ಯ ಬಳಕೆಯಲ್ಲಿ ಇವು ಡಿಎನ್‌ಎಗೆ ನೇರ ಹಾನಿ ಉಂಟುಮಾಡುವಷ್ಟು ಶಕ್ತಿಯನ್ನು ಹೊಂದಿರುವುದಿಲ್ಲ.
ಮೊಬೈಲ್‌ನಿಂದ ಹೃದಯದ ಬಡಿತದಲ್ಲಿ ಏರುಪೇರಾಗುತ್ತಾ?
ಸಾಮಾನ್ಯವಾಗಿ ಆರೋಗ್ಯವಂತ ವ್ಯಕ್ತಿಗಳು ಮೊಬೈಲ್ ಬಳಸುವುದರಿಂದ ಹೃದಯದ ಬಡಿತದ ಲಯದಲ್ಲಿ ಅಸಹಜ ಬದಲಾವಣೆ ಉಂಟಾಗುತ್ತದೆ ಎಂಬುದಕ್ಕೆ ದೃಢವಾದ ವೈಜ್ಞಾನಿಕ ಪುರಾವೆಗಳಿಲ್ಲ. ಹೀಗಾಗಿ ಶರ್ಟ್‌ನ ಎಡ ಜೇಬಿನಲ್ಲಿ ಮೊಬೈಲ್ ಇಟ್ಟುಕೊಳ್ಳುವುದರಿಂದ ಹೃದಯದ ಬಡಿತ ಹೆಚ್ಚಾಗುತ್ತದೆ ಅಥವಾ ಹೃದಯದ ಕಾರ್ಯಚಟುವಟಿಕೆಗೆ ಹಾನಿಯಾಗುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ.
ಕೆಲವೊಮ್ಮೆ ಜೇಬಿನಲ್ಲಿರುವ ಮೊಬೈಲ್ ವೈಬ್ರೇಟ್ ಆದಾಗ ಎದೆಯ ಭಾಗದಲ್ಲಿ ಕಂಪನ ಅನುಭವವಾಗಬಹುದು. ಇದನ್ನು ಕೆಲವರು ಹೃದಯದ ಬಡಿತದಲ್ಲಿ ಬದಲಾವಣೆಯಾಗಿದೆ ಎಂದು ತಪ್ಪಾಗಿ ಭಾವಿಸಬಹುದು. ಆದರೆ ಮೊಬೈಲ್ ಕಂಪನಕ್ಕೂ ಹೃದಯದ ಲಯದಲ್ಲಿನ ಬದಲಾವಣೆಗೂ ಸಂಬಂಧವಿದೆ ಎಂದರ್ಥವಲ್ಲ.
ಪೇಸ್‌ಮೇಕರ್ ಹೊಂದಿರುವವರು ಎಚ್ಚರ!
ಪೇಸ್‌ಮೇಕರ್ ಅಥವಾ ಇಂಪ್ಲಾಂಟೆಬಲ್ ಕಾರ್ಡಿಯೋವರ್ಟರ್ ಡಿಫಿಬ್ರಿಲೇಟರ್ (ICD) ಅಳವಡಿಸಿಕೊಂಡಿರುವವರು ಮಾತ್ರ ಕೆಲವು ಮುನ್ನೆಚ್ಚರಿಕೆಗಳನ್ನು ಪಾಲಿಸಬೇಕು. ಮೊಬೈಲ್‌ನಲ್ಲಿರುವ ಕೆಲವು ಚುಂಬಕಗಳು ಇಂತಹ ಹೃದಯದ ಸಾಧನಗಳ ಕಾರ್ಯನಿರ್ವಹಣೆಗೆ ತಾತ್ಕಾಲಿಕವಾಗಿ ಅಡ್ಡಿಪಡಿಸುವ ಸಾಧ್ಯತೆಯಿದೆ.
ಹೀಗಾಗಿ ಮೊಬೈಲ್ ಅನ್ನು ಹೃದಯದ ಸಾಧನ ಅಳವಡಿಸಿರುವ ಜಾಗದ ಸಮೀಪ ಇಡಬಾರದು. ವೈದ್ಯರು ಮತ್ತು ಸಾಧನ ತಯಾರಕರು ಸೂಚಿಸಿರುವ ಸುರಕ್ಷಿತ ಅಂತರವನ್ನು ಕಾಪಾಡಿಕೊಳ್ಳಬೇಕು.
ಯಾವ ಲಕ್ಷಣಗಳು ಕಂಡುಬಂದರೆ ವೈದ್ಯರನ್ನು ಸಂಪರ್ಕಿಸಬೇಕು?
ಆಗಾಗ ಹೃದಯ ಬಡಿತ ಹೆಚ್ಚಾಗುವುದು, ತಲೆಸುತ್ತು, ಉಸಿರಾಟದ ತೊಂದರೆ ಅಥವಾ ಎದೆನೋವು ಕಾಣಿಸಿಕೊಂಡರೆ ನಿರ್ಲಕ್ಷಿಸಬಾರದು. ತಕ್ಷಣ ವೈದ್ಯಕೀಯ ಸಲಹೆ ಪಡೆಯಬೇಕು. ತೀವ್ರ ಎದೆನೋವು ಅಥವಾ ಉಸಿರಾಟದ ತೊಂದರೆ ಕಾಣಿಸಿಕೊಂಡರೆ ತುರ್ತು ವೈದ್ಯಕೀಯ ನೆರವು ಪಡೆಯುವುದು ಅಗತ್ಯ.
ಒಟ್ಟಿನಲ್ಲಿ: ಆರೋಗ್ಯವಂತ ವ್ಯಕ್ತಿಗಳು ಶರ್ಟ್‌ನ ಎಡ ಜೇಬಿನಲ್ಲಿ ಮೊಬೈಲ್ ಇಟ್ಟುಕೊಳ್ಳುವುದರಿಂದಲೇ ಹೃದಯಕ್ಕೆ ಹಾನಿಯಾಗುತ್ತದೆ ಎಂಬ ಆತಂಕಕ್ಕೆ ಸದ್ಯಕ್ಕೆ ದೃಢವಾದ ವೈಜ್ಞಾನಿಕ ಆಧಾರವಿಲ್ಲ. ಆದರೆ ಹೃದಯಕ್ಕೆ ಸಂಬಂಧಿಸಿದ ಸಾಧನಗಳನ್ನು ಅಳವಡಿಸಿಕೊಂಡಿರುವವರು ವೈದ್ಯರ ಸೂಚನೆ ಪಾಲಿಸುವುದು ಮುಖ್ಯ.
