‘ಪ್ರೇಮದ ಊರಲಿ’ ಸಿನಿಮಾದ ಗೆಲುವಿನ ಖುಷಿಯಲ್ಲಿರುವ ನಿರ್ದೇಶಕ ಮನೋಜ್ ಕುಮಾರ್ ಸಾಲು ಸಾಲು ಸಂದರ್ಶನಗಳಲ್ಲಿ ಭಾಗಿಯಾಗುತ್ತಿದ್ದಾರೆ. ಸಿನಿಮಾ, ಅದರ ಪಾತ್ರಗಳು ಹಾಗೂ ತೆರೆ ಹಿಂದಿನ ಹಲವು ಕುತೂಹಲಕಾರಿ ಸಂಗತಿಗಳನ್ನು ಹಂಚಿಕೊಳ್ಳುತ್ತಿರುವ ಅವರು, ಇದೀಗ ನಟಿ ರುಕ್ಮಿಣಿ ವಸಂತ್ ಹಾಗೂ ತಮ್ಮ ಸಿನಿಮಾಗಿರುವ ವಿಶೇಷ ಕನೆಕ್ಷನ್‌ವೊಂದನ್ನು ಬಹಿರಂಗಪಡಿಸಿದ್ದಾರೆ.

ರುಕ್ಮಿಣಿ ವಸಂತ್‌ರನ್ನು ಸಿನಿಮಾಗೆ ಕರೆತರಬೇಕೆಂಬ ಆಸೆ!

ಕನ್ನಡ ಮಾತ್ರವಲ್ಲದೆ ಬೇರೆ ಭಾಷೆಗಳಲ್ಲೂ ಗಮನ ಸೆಳೆಯುತ್ತಿರುವ ನಟಿ ರುಕ್ಮಿಣಿ ವಸಂತ್ ಅವರ ಅಭಿನಯಕ್ಕೆ ತಾವು ಕೂಡ ದೊಡ್ಡ ಅಭಿಮಾನಿ ಎಂದು ಮನೋಜ್ ಕುಮಾರ್ ಹೇಳಿದ್ದಾರೆ.

‘ಪ್ರೇಮದ ಊರಲಿ’ ಚಿತ್ರದ ಪ್ರಮುಖ ಪಾತ್ರವೊಂದಕ್ಕೆ ರುಕ್ಮಿಣಿ ವಸಂತ್ ಅವರನ್ನು ಕರೆತರಬೇಕು ಎಂಬ ಆಸೆಯೂ ನಿರ್ದೇಶಕರಿಗಿತ್ತಂತೆ. ಈ ಸಂಬಂಧ ನಟಿಯನ್ನು ಸಂಪರ್ಕಿಸಲು ಚಿತ್ರತಂಡ ಪ್ರಯತ್ನಿಸಿತ್ತು ಎಂದು ಮನೋಜ್ ತಿಳಿಸಿದ್ದಾರೆ.

ಆದರೆ ರುಕ್ಮಿಣಿ ಅವರ ಕಾಲ್‌ಶೀಟ್ ಹಾಗೂ ಡೇಟ್ಸ್ ಹೊಂದಾಣಿಕೆಯಾಗದಿರುವುದು, ಜೊತೆಗೆ ಚಿತ್ರ ಸಣ್ಣ ಬಜೆಟ್‌ನಲ್ಲಿ ನಿರ್ಮಾಣವಾಗುತ್ತಿದ್ದ ಕಾರಣ ಈ ಪ್ಲ್ಯಾನ್ ಕಾರ್ಯರೂಪಕ್ಕೆ ಬರಲಿಲ್ಲ ಎಂದು ಅವರು ವಿವರಿಸಿದ್ದಾರೆ.

ನಟಿ ಬರಲಿಲ್ಲ.. ಆದರೆ ಹೆಸರು ಸಿನಿಮಾದಲ್ಲಿ ಉಳಿಯಿತು!

ರುಕ್ಮಿಣಿ ವಸಂತ್ ಅವರನ್ನು ಸಿನಿಮಾಗೆ ಕರೆತರಲು ಸಾಧ್ಯವಾಗದಿದ್ದರೂ ನಿರ್ದೇಶಕರು ಮಾತ್ರ ಅವರ ಹೆಸರನ್ನು ಬಿಟ್ಟಿಲ್ಲ! ‘ರುಕ್ಮಿಣಿ ವಸಂತ್’ ಎಂಬ ಹೆಸರು ತಮಗೆ ತುಂಬಾ ಇಷ್ಟವಾಗಿದ್ದರಿಂದ, ಸಿನಿಮಾದ ಇಬ್ಬರು ನಾಯಕಿಯರ ಪಾತ್ರಗಳಿಗೆ ಆ ಹೆಸರನ್ನೇ ವಿಭಜಿಸಿ ‘ರುಕ್ಮಿಣಿ’ ಮತ್ತು ‘ವಸಂತ’ ಎಂದು ಹೆಸರಿಟ್ಟಿದ್ದಾರೆ. ಹೀಗೆ ರುಕ್ಮಿಣಿ ವಸಂತ್ ಸಿನಿಮಾದಲ್ಲಿ ನಟಿಸದಿದ್ದರೂ, ಅವರ ಹೆಸರು ಮಾತ್ರ ಚಿತ್ರದ ಎರಡು ಪ್ರಮುಖ ಪಾತ್ರಗಳ ಮೂಲಕ ಉಳಿದುಕೊಂಡಿದೆ.

‘ವಸಂತ’ ಪಾತ್ರದ ಹಿಂದಿದೆ ವಿಶೇಷ ಅರ್ಥ

ಇಷ್ಟೇ ಅಲ್ಲ, ‘ವಸಂತ’ ಎನ್ನುವ ಪಾತ್ರಕ್ಕೂ ವಿಶೇಷ ಅರ್ಥವಿದೆ ಎಂದು ನಿರ್ದೇಶಕರು ತಿಳಿಸಿದ್ದಾರೆ. ಈ ಪಾತ್ರವನ್ನು ರೂಪಕವಾಗಿ ನಿಸರ್ಗ ಅಥವಾ ಪ್ರಕೃತಿಯನ್ನು ಪ್ರತಿಬಿಂಬಿಸುವಂತೆ ಕಟ್ಟಿಕೊಡಲಾಗಿದೆ ಎಂದು ಮನೋಜ್ ಕುಮಾರ್ ವಿವರಿಸಿದ್ದಾರೆ. ಹೀಗಾಗಿ ಸಿನಿಮಾದ ಪಾತ್ರಗಳಿಗೆ ಇಟ್ಟಿರುವ ಹೆಸರುಗಳು ಕೇವಲ ಹೆಸರುಗಳಾಗಿರದೆ, ಕಥೆಯೊಳಗೂ ಅವುಗಳಿಗೆ ಪ್ರತ್ಯೇಕ ಮಹತ್ವವಿದೆ ಎನ್ನಲಾಗಿದೆ.

ಮೊದಲು ಸಿನಿಮಾದ ಟೈಟಲ್ ಕೂಡ ‘ರುಕ್ಮಿಣಿ ವಸಂತ’!

ಇಡೀ ಕಥೆಯಲ್ಲಿರುವ ಮತ್ತೊಂದು ಇಂಟರೆಸ್ಟಿಂಗ್ ಟ್ವಿಸ್ಟ್ ಎಂದರೆ, ‘ಪ್ರೇಮದ ಊರಲಿ’ ಚಿತ್ರಕ್ಕೆ ಆರಂಭದಲ್ಲಿ ‘ರುಕ್ಮಿಣಿ ವಸಂತ’ ಎಂದೇ ಟೈಟಲ್ ಇಡಲಾಗಿತ್ತಂತೆ. ನಂತರ ಚಿತ್ರದ ಶೀರ್ಷಿಕೆಯನ್ನು ಬದಲಾಯಿಸಿ ಅಂತಿಮವಾಗಿ ‘ಪ್ರೇಮದ ಊರಲಿ’ ಎಂದು ಹೆಸರಿಡಲಾಯಿತು ಎಂದು ನಿರ್ದೇಶಕರು ತಿಳಿಸಿದ್ದಾರೆ.

ಹೀಗಾಗಿ ನಟಿ ರುಕ್ಮಿಣಿ ವಸಂತ್ ಚಿತ್ರದಲ್ಲಿ ಕಾಣಿಸಿಕೊಳ್ಳದಿದ್ದರೂ, ಸಿನಿಮಾದ ಆರಂಭಿಕ ಟೈಟಲ್‌ನಿಂದ ಹಿಡಿದು ಎರಡು ಪ್ರಮುಖ ಪಾತ್ರಗಳ ಹೆಸರಿನವರೆಗೂ ಅವರ ಹೆಸರಿನ ಕನೆಕ್ಷನ್ ಇರುವುದು ಇದೀಗ ಅಭಿಮಾನಿಗಳ ಗಮನ ಸೆಳೆದಿದೆ. ಇನ್ನು ಚಿತ್ರವು ಬಿಡುಗಡೆಯಾದ ನಂತರ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿದ್ದು, ನಿರ್ದೇಶಕರ ಹೇಳಿಕೆಯಂತೆ 10 ದಿನಗಳಲ್ಲಿ ಸುಮಾರು ₹16 ಕೋಟಿ ಗಳಿಕೆ ಮಾಡಿದೆ. ಚಿತ್ರದ ಗೆಲುವಿನ ಬೆನ್ನಲ್ಲೇ ನಿರ್ದೇಶಕ ಮನೋಜ್ ಕುಮಾರ್ ಹಂಚಿಕೊಳ್ಳುತ್ತಿರುವ ತೆರೆ ಹಿಂದಿನ ಇಂತಹ ಸಂಗತಿಗಳು ಸಿನಿಪ್ರಿಯರಲ್ಲಿ ಮತ್ತಷ್ಟು ಕುತೂಹಲ ಮೂಡಿಸುತ್ತಿವೆ.