ಬರ ಪರಿಹಾರ ವಿಚಾರದಲ್ಲಿ ವಿಪಕ್ಷಗಳಿಂದ ರಾಜಕೀಯ: ಬಿಜೆಪಿ ಆರೋಪಕ್ಕೆ ಪರಮೇಶ್ವರ್ ತಿರುಗೇಟು

ಬೆಂಗಳೂರು: ರಾಜ್ಯದಲ್ಲಿ ಬರ ಪರಿಹಾರ ಪಾವತಿ ವಿಚಾರಕ್ಕೆ ಸಂಬಂಧಿಸಿದಂತೆ ವಿಪಕ್ಷಗಳು ಕೇವಲ ರಾಜಕೀಯ ಮಾಡುತ್ತಿವೆಯೇ ಹೊರತು, ಅವರಿಗೆ ರೈತರಿಗೆ ಹಾಗೂ ಜನರಿಗೆ ಸಹಾಯ ಮಾಡುವುದು ಬೇಕಾಗಿಲ್ಲ ಎಂದು ಪರಮೇಶ್ವರ್ ತೀವ್ರ ವಾಗ್ದಾಳಿ ನಡೆಸಿದ್ದಾರೆ.

 ರಾಜ್ಯ ಸರ್ಕಾರ ನೀಡುತ್ತಿರುವ ಬರ ಪರಿಹಾರ ಮೊತ್ತ ಕಡಿಮೆಯಾಗಿದೆ ಎಂಬ ವಿಪಕ್ಷಗಳ ಆರೋಪಕ್ಕೆ ಬೆಂಗಳೂರಿನಲ್ಲಿ ಪ್ರತಿಕ್ರಿಯಿಸಿದ ಅವರು, “ರಾಜ್ಯ ಸರ್ಕಾರ ತಕ್ಷಣದ ಮೊದಲ ಹಂತದ ಪರಿಹಾರವಾಗಿ ಬಿಡುಗಡೆ ಮಾಡುತ್ತಿರುವ ₹1,250 ಕೋಟಿ ಸಣ್ಣ ಹಣವೇನಲ್ಲ. ಸ್ವಾಭಾವಿಕವಾಗಿ ಇದು ಕಡಿಮೆಯೆನಿಸಿದರೂ, ತಕ್ಷಣಕ್ಕೆ ಈ ಮೊತ್ತ ನೀಡುತ್ತಿದ್ದೇವೆ.

ಇದು ಮಾತ್ರವಲ್ಲದೆ ರೈತರಿಗೆ ₹22,000 ಕೋಟಿ ಪವರ್ ಸಬ್ಸಿಡಿ, ಉಚಿತ ಅಕ್ಕಿ ಹಾಗೂ ರೈತರ ಕುಟುಂಬದ ಹೆಣ್ಣುಮಕ್ಕಳಿಗೆ ₹2,000 ನೆರವು ನೀಡಲಾಗುತ್ತಿದೆ. ಇದೆಲ್ಲವೂ ರೈತರಿಗೆ ತಲುಪುತ್ತಿರುವ ಸಹಾಯವೇ ಆಗಿದೆ. ಮುಂದೆ ಕೇಂದ್ರ ಸರ್ಕಾರ ನೀಡುವ ಪರಿಹಾರದ ಮೇಲೆ ಮುಂದಿನ ನಿರ್ಧಾರವಾಗಲಿದೆ” ಎಂದು ವಿವರಿಸಿದರು.

 ಬರ ನಷ್ಟದ ಕುರಿತು ಮಾತನಾಡಿದ ಅವರು, “ರಾಜ್ಯದಲ್ಲಿ ಬರಗಾಲದಿಂದ ಬರೋಬ್ಬರಿ ₹40,000 ಕೋಟಿಗೂ ಹೆಚ್ಚು ನಷ್ಟವಾಗಿದೆ ಎಂದು ಅಂದಾಜಿಸಲಾಗಿದೆ. ಈಗಾಗಲೇ ಕೇಂದ್ರ ಸರ್ಕಾರಕ್ಕೆ ಒಂದು ಮನವಿ ಪತ್ರ ನೀಡಲಾಗಿದ್ದು, ಇನ್ನು ಎರಡು ಮನವಿ ಪತ್ರಗಳನ್ನು ಸಲ್ಲಿಸಲಾಗುವುದು. ಕಳೆದೆರಡು ಬಾರಿ ₹18,000 ಕೋಟಿ ಬಂದಿತ್ತು, ಈ ಬಾರಿ ಎಷ್ಟು ಬರಲಿದೆ ಎಂದು ಕಾಯ್ದು ನೋಡಬೇಕಿದೆ. ನಷ್ಟದ ಲೆಕ್ಕಾಚಾರ ಮಾಡಲು ಕೇಂದ್ರ ಸರ್ಕಾರ ಐಎಎಸ್ ಅಧಿಕಾರಿಯೊಬ್ಬರನ್ನು ನೇಮಕ ಮಾಡಿದ್ದು, ಕೇಂದ್ರ ತಂಡ ಬಂದು ಅಸೆಸ್ ಮಾಡಿದ ನಂತರ ಅಂತಿಮ ಮೊತ್ತ ತಿಳಿಯಲಿದೆ” ಎಂದರು. ಕೇಂದ್ರಕ್ಕೆ ಸರ್ವಪಕ್ಷ ನಿಯೋಗ ಕರೆದೊಯ್ಯುವ ಕುರಿತು ಸ್ಪಷ್ಟನೆ ನೀಡಿದ ಅವರು, “ಪ್ರಧಾನಮಂತ್ರಿಗಳು, ಗೃಹ ಸಚಿವರು ಹಾಗೂ ಕೃಷಿ ಸಚಿವರನ್ನು ಭೇಟಿ ಮಾಡಲು ಸರ್ಕಾರ ಸಿದ್ಧತೆ ನಡೆಸುತ್ತಿದೆ. ವಿಪಕ್ಷಗಳು ಬರಲು ತಯಾರಿದ್ದರೆ ಅವರನ್ನೂ ಸರ್ವಪಕ್ಷ ನಿಯೋಗದಲ್ಲಿ ದೆಹಲಿಗೆ ಕರೆದುಕೊಂಡು ಹೋಗುತ್ತೇವೆ. ಆದರೆ ನಿಯೋಗ ತೆರಳುವ ದಿನಾಂಕ ಇನ್ನೂ ನಿಗದಿಯಾಗಿಲ್ಲ” ಎಂದು ತಿಳಿಸಿದರು.