ಬಾಲಿವುಡ್‌ನ ಬೋಲ್ಡ್ ನಟಿ ಸ್ವರಾ ಭಾಸ್ಕರ್ ಇದೀಗ ತಮ್ಮ ಸಿನಿಮಾ ಜರ್ನಿಯ ಆರಂಭದಲ್ಲಿ ಎದುರಿಸಿದ ಕಹಿ ಘಟನೆಯೊಂದನ್ನು ಬಹಿರಂಗಪಡಿಸಿದ್ದಾರೆ. ಕುಡಿದ ಮತ್ತಿನಲ್ಲಿದ್ದ ನಿರ್ದೇಶಕನೊಬ್ಬ ತಮ್ಮೊಂದಿಗೆ ಅನುಚಿತವಾಗಿ ವರ್ತಿಸಿದ್ದ ಎಂದು ನಟಿ ಹೇಳಿಕೊಂಡಿದ್ದು, ಅವರ ಹೇಳಿಕೆ ಬಾಲಿವುಡ್ ಅಂಗಳದಲ್ಲಿ ಚರ್ಚೆಗೆ ಕಾರಣವಾಗಿದೆ.
‘Tanu Weds Manu’ ಹಿಟ್ ಬಳಿಕ ನಡೆದಿತ್ತಂತೆ ಘಟನೆ!
‘ತನು ವೆಡ್ಸ್ ಮನು’ ಸಿನಿಮಾ ಸೂಪರ್ ಹಿಟ್ ಆದ ನಂತರ ತಾವು ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದ ಮತ್ತೊಂದು ಚಿತ್ರದ ಶೂಟಿಂಗ್ ವೇಳೆ ಈ ಘಟನೆ ನಡೆದಿತ್ತು ಎಂದು ಸ್ವರಾ ಹೇಳಿದ್ದಾರೆ.
ಆ ಚಿತ್ರದ ನಿರ್ದೇಶಕ ಆಗಾಗ ತಮಗೆ ಕವಿತೆಗಳನ್ನು ಕಳುಹಿಸುತ್ತಿದ್ದ ಎಂದು ಹೇಳಿರುವ ಸ್ವರಾ, ಒಂದು ಹಂತದಲ್ಲಿ ಪ್ರಣಯ ದೃಶ್ಯದ ರಿಹರ್ಸಲ್‌ಗಾಗಿ ಖಾಸಗಿಯಾಗಿ ಬರುವಂತೆ ಕರೆದಿದ್ದ ಎಂದಿದ್ದಾರೆ. ಇತರ ನಟರು ಅಥವಾ ಕ್ಯಾಮೆರಾ ತಂಡ ಇಲ್ಲದೆ ಒಬ್ಬಂಟಿಯಾಗಿ ಬರುವಂತೆ ಹೇಳಿದ್ದು ತಮಗೆ ಅನುಮಾನ ಮೂಡಿಸಿತ್ತು ಎಂದು ಸ್ವರಾ ನೆನಪಿಸಿಕೊಂಡಿದ್ದಾರೆ.
ಗೆಸ್ಟ್ ಹೌಸ್‌ನಲ್ಲಿ ಶುರುವಾಯ್ತು ಆತಂಕ!
ಶೂಟಿಂಗ್ ವೇಳೆ ಗೆಸ್ಟ್ ಹೌಸ್‌ನಲ್ಲಿ ಉಳಿದುಕೊಂಡಿದ್ದಾಗ ನಿರ್ದೇಶಕ ಮತ್ತು ಕ್ಯಾಮೆರಾಮ್ಯಾನ್ ಮದ್ಯಪಾನ ಮಾಡುತ್ತಿರುವುದನ್ನು ಗಮನಿಸಿದ್ದಾಗಿ ಸ್ವರಾ ಹೇಳಿದ್ದಾರೆ. ಆ ಸಮಯದಲ್ಲಿ ತಾವು ಯುವತಿಯಾಗಿದ್ದು, ಅಂತಹ ವಾತಾವರಣ ತೀವ್ರ ಅಸುರಕ್ಷಿತ ಭಾವನೆ ಮೂಡಿಸಿತ್ತು ಎಂದು ಅವರು ವಿವರಿಸಿದ್ದಾರೆ. ಹೀಗಾಗಿ ಅಲ್ಲಿಂದ ಹೊರಬಂದಿದ್ದಾಗಿ ಹೇಳಿದ್ದಾರೆ.
ಆದರೆ ಘಟನೆ ಅಲ್ಲಿಗೇ ಮುಗಿದಿರಲಿಲ್ಲ. ಸ್ವರಾ ಹೇಳುವ ಪ್ರಕಾರ, ಅದೇ ರಾತ್ರಿ ಮದ್ಯದ ಅಮಲಿನಲ್ಲಿದ್ದ ನಿರ್ದೇಶಕ ತಮ್ಮ ಕೊಠಡಿಯ ಬಾಗಿಲನ್ನು ಜೋರಾಗಿ ತಟ್ಟಿದ್ದಾನೆ.
ಬಾಗಿಲು ತೆರೆದಾಗ ತನ್ನನ್ನು ಅಪ್ಪಿಕೊಳ್ಳುವಂತೆ ನಿರ್ದೇಶಕ ಒತ್ತಾಯಿಸಿದ್ದಾನೆ ಎಂದು ನಟಿ ಆರೋಪಿಸಿದ್ದಾರೆ. ಆತ ತೂರಾಡುತ್ತಾ ಒತ್ತಾಯಿಸುತ್ತಿದ್ದಾಗ ತಾವು ಸ್ಪಷ್ಟವಾಗಿ ನಿರಾಕರಿಸಿದ್ದಾಗಿ ಸ್ವರಾ ಹೇಳಿದ್ದಾರೆ. ಈ ಘಟನೆ ತಮ್ಮಲ್ಲಿ ತೀವ್ರ ಭಯ ಹುಟ್ಟಿಸಿತ್ತು ಎಂದು ನಟಿ ನೆನಪಿಸಿಕೊಂಡಿದ್ದಾರೆ.
ನಿರ್ದೇಶಕ ಯಾರು? ಸಿನಿಮಾ ಯಾವುದು?
ಸ್ವರಾ ಭಾಸ್ಕರ್ ಈ ಅನುಭವವನ್ನು ರಿಯಾಲಿಟಿ ಶೋನಲ್ಲಿ ಸಹ ಸ್ಪರ್ಧಿಗಳೊಂದಿಗೆ ಹಂಚಿಕೊಂಡಿದ್ದಾರೆ. ಆದರೆ ಘಟನೆಗೆ ಸಂಬಂಧಿಸಿದ ನಿರ್ದೇಶಕನ ಹೆಸರು ಅಥವಾ ಚಿತ್ರದ ಹೆಸರನ್ನು ಅವರು ಬಹಿರಂಗಪಡಿಸಿಲ್ಲ. ಹೀಗಾಗಿ ಸ್ವರಾ ಹೇಳಿರುವ ವಿವರಗಳನ್ನು ಆಧರಿಸಿ ನಿರ್ದಿಷ್ಟ ನಿರ್ದೇಶಕ ಅಥವಾ ಸಿನಿಮಾದ ಹೆಸರನ್ನು ಊಹಿಸುವುದು ಸೂಕ್ತವಲ್ಲ. ಆರೋಪಕ್ಕೆ ಸಂಬಂಧಿಸಿದಂತೆ ನಿರ್ದೇಶಕರ ಪ್ರತಿಕ್ರಿಯೆಯೂ ಸದ್ಯ ಲಭ್ಯವಾಗಿಲ್ಲ.
Join WhatsApp
