ಬಿಗ್‌ಬಾಸ್ ಕನ್ನಡ ಸೀಸನ್ 13’ರಲ್ಲಿ ದಿನದಿಂದ ದಿನಕ್ಕೆ ಮನರಂಜನೆಯ ಕಾವು ಹೆಚ್ಚುತ್ತಿದೆ.
ಆರಂಭದ ವಾರಗಳಲ್ಲಿ ಮೌನವಾಗಿದ್ದ ಸೌಂದರ್ಯಾ ಶೆಟ್ಟಿ ಇದೀಗ ತಮ್ಮ ವಿಭಿನ್ನ ಆಟದ ಮೂಲಕ ಪ್ರೇಕ್ಷಕರ ಗಮನ ಸೆಳೆಯುತ್ತಿದ್ದಾರೆ. ಅವರ ನಟನೆ, ಮಾತಿನ ಶೈಲಿ ಹಾಗೂ ವರ್ತನೆಗೆ ವೀಕ್ಷಕರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.
ಆರಂಭದಲ್ಲಿ ಮಂಜು ಅವರ ಕೂಗಾಟ ಮತ್ತು ಕಿರುಚಾಟದಿಂದ ಬೇಸರಗೊಂಡಿದ್ದ ವೀಕ್ಷಕರಿಗೆ, ಅವರು ಮನೆಯಿಂದ ಹೊರಹೋದ ಬಳಿಕ ಬಿಗ್‌ಬಾಸ್ ಮನೆಯಲ್ಲಿ ಹೊಸ ಮನರಂಜನೆ ಸಿಗುತ್ತಿದೆ. ಕಳೆದ ವಾರ ಸೌಂದರ್ಯಾ ಶೆಟ್ಟಿ ಮತ್ತು ತಾಂಡವ್ ಗಮನ ಸೆಳೆದಿದ್ದರೆ, ಈ ವಾರ ಪ್ರಶಾಂತ್ ಕೂಡ ತಮ್ಮ ಹಾಸ್ಯ ಹಾಗೂ ವಿಭಿನ್ನ ಪಾತ್ರದ ಮೂಲಕ ವೀಕ್ಷಕರನ್ನು ರಂಜಿಸಿದ್ದಾರೆ.
ಕಳೆದ ವಾರ ನಡೆದ ಡೈಮಂಡ್ ಕದಿಯುವ ಟಾಸ್ಕ್ ವೀಕ್ಷಕರಲ್ಲಿ ಕುತೂಹಲ ಮೂಡಿಸಿತ್ತು. ಈ ವಾರ ‘ಶೆಟ್ಟಿ ಡಾನ್ ಮದುವೆ ಶಾಸ್ತ್ರ’ದ ಸಂಭ್ರಮ ಬಿಗ್‌ಬಾಸ್ ಮನೆಯಲ್ಲಿ ಹೊಸ ಮನರಂಜನೆಯ ವಾತಾವರಣ ಸೃಷ್ಟಿಸಿದೆ.
ಇನ್ನು ತಾಂಡವ್ ರಾಮ್ ಕೂಡ ಈ ವಾರ ಉತ್ತಮ ಪ್ರದರ್ಶನ ನೀಡಿದ್ದಾರೆ. ಈ ಹಿಂದೆ ಗಗನ್ ಚಿನ್ನಪ್ಪ ಅವರ ಮನವೊಲಿಸುವುದರಲ್ಲೇ ಹೆಚ್ಚು ಸಮಯ ಕಳೆಯುತ್ತಿದ್ದ ಅವರು, ಇದೀಗ ಆಟದ ಮೂಲಕ ಗಮನ ಸೆಳೆಯುತ್ತಿದ್ದಾರೆ. ಅದರಲ್ಲೂ ಶೆಟ್ಟಿ ಡಾನ್ ಅವರ ತಂದೆಯ ಪಾತ್ರದಲ್ಲಿ ಕಾಣಿಸಿಕೊಂಡು ಮೆಚ್ಚುಗೆ ಗಳಿಸಿದ್ದಾರೆ.
ಈ ವಾರ ಸೌಂದರ್ಯಾ ಶೆಟ್ಟಿ ಅವರ ತಾಯಿ ಪಾತ್ರದಲ್ಲಿ ಪ್ರಶಾಂತ್ ಮಿಂಚಿದ್ದಾರೆ. ಹುಡುಗಿಯ ಗೆಟಪ್‌ನಲ್ಲಿ ಕಾಣಿಸಿಕೊಂಡು ಅವರು ನೀಡಿದ ಮನರಂಜನೆಗೆ ವೀಕ್ಷಕರು ಫಿದಾ ಆಗಿದ್ದಾರೆ. ಸಾಮಾನ್ಯವಾಗಿ ಕಾಣಿಸಿಕೊಳ್ಳುವುದಕ್ಕಿಂತ ಈ ಗೆಟಪ್‌ನಲ್ಲಿ ಪ್ರಶಾಂತ್ ಹೆಚ್ಚು ಇಷ್ಟವಾಗುತ್ತಿದ್ದಾರೆ ಎಂಬ ಅಭಿಪ್ರಾಯವೂ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಕ್ತವಾಗುತ್ತಿದೆ. ಅವರ ಈ ಪ್ರದರ್ಶನಕ್ಕೆ ಕಿಚ್ಚನ ಚಪ್ಪಾಳೆ ಸಿಗಬೇಕು ಎಂಬ ಮಾತುಗಳು ಕೇಳಿಬರುತ್ತಿವೆ.
ಇನ್ನು ಈ ವಾರ ಯಶಸ್ ಅವರು ಗಗನ್ ವಿರುದ್ಧ ಆಕ್ಷೇಪಾರ್ಹವಾಗಿ ಮಾತನಾಡಿದ ಪ್ರಸಂಗ ಹೊರತುಪಡಿಸಿದರೆ, ಮನೆಯಲ್ಲಿ ದೊಡ್ಡ ಮಟ್ಟದ ಜಗಳಗಳು ನಡೆದಿಲ್ಲ. ಇದು ವೀಕ್ಷಕರಿಗೆ ಕೊಂಚ ನೆಮ್ಮದಿ ನೀಡಿದೆ. ಒಟ್ಟಿನಲ್ಲಿ, ಸೌಂದರ್ಯಾ ಶೆಟ್ಟಿ, ತಾಂಡವ್ ಮತ್ತು ಪ್ರಶಾಂತ್ ಅವರ ಮನರಂಜನೆಯಿಂದ ಬಿಗ್‌ಬಾಸ್ ಸೀಸನ್ 13 ಮತ್ತೆ ವೀಕ್ಷಕರ ಗಮನ ಸೆಳೆಯುತ್ತಿದೆ.
